'Dingo-moordsaak' weer heropen
2012-02-24 20:51
Sydney – 'n Nuwe hofsaak gaan in Australië gehou word oor die verdwyning in 1980 van die nege weke oue baba Azaria Chamberlain, wie se ouers volhou dat sy deur 'n dingo (wilde hond) weggedra is.
Die baba se ma, Lindy Chamberlain-Creighton, is in 1982 aan moord op haar dogtertjie skuldig bevind, maar die skuldigbevinding is later ter syde gestel, nadat 'n stukkie materiaal van Azaria se klere in 'n dingo-lêplek gevind is, berig RSG.
In 1995 is 'n nuwe ondersoek begin en is uitspraak voorbehou.
Die ma en haar man wil egter hê die hof moet amptelik beslis dat die dingo wel hulle baba weggedra het.
Anne Lade, 'n voormalige polisiebeampte wat deur die hof aangestel is om die saak te ondersoek, het aan die hof gesê sedert Azaria se verdwyning was daar al verskeie dingo-aanvalle op mense waarvan sommige dodelik was.
Rex Wild, 'n prokureur, het verskeie van die aanvalle beskryf en gesê hy glo dié bewyse kan toon dat 'n dingo dalk verantwoordelik vir Azaria se dood kon wees.
Op Azaria se doodsertifikaat staan steeds dat die oorsaak van haar dood nie bekend is nie.
Azaria het op 17 Augustus 1980 tydens 'n familievakansie in Uluru, die bekende rooi monoliet, verdwyn.
Haar lyk is nooit gevind nie.
Beamptes glo egter 'n dingo is nie sterk genoeg om die baba weg te dra nie en het Lindy van moord aangekla.
Staatsaanklaers het aangevoer dat sy haar baba se keel in die familie se motor afgesny en die lyk begrawe het sonder om enige spore te laat.
Drie jaar nadat Lindy begin het om haar vonnis uit te dien, is Azaria se baadjie, wat sy aangehad het, naby 'n dingo-lêplek gevind.
Lindy is toe vrygespreek.
– Volg Nuus24 op Twitter.
- Sapa - AP
