Diamante in Moembaai-puin gevind
2011-07-18 14:42
Moembaai – Talle diamante is in die verlate strate van Moembaai, Indië, gevind ná verlede week se bomontploffings wat die stad geruk het, het ‘n bedryfsgroep gesê.
Werkers het die stene gevind terwyl hulle deur die puin gesoek het. Die 65 diamante is in ‘n gebied in die suide van die stad gevind waar mense gewoonlik met dié stene handeldryf.
Dié gebied is een van die drie besige plekke wat Woensdag geteiken is. Altesaam 19 mense is in die aanval dood.
“Ons het 65 stukke gevind,” het Jayesh Labdhi, ‘n komiteelid van die handelsgroep Mumbai Diamond Merchants' Association, gesê.
“Ons sal ‘n vergadering hou... en hulle sal dalk opgeveil word om beseerdes te help...” het hy bygevoeg.
Labdhi het aan AFP gesê die waarde van die diamante is nog nie bekend nie.
Volg Nuus24 op Twitter.
- Sapa - AFP