Derde verdagte in bendeverkragting pleit ook onskuldig
2013-01-09 12:36
Nieu-Delhi – Die derde beskuldigde wat na bewering saam met vyf ander verdagtes verlede maand 'n 23-jarige vrou in 'n bewegende bus in Nieu-Delhi verkrag het, sal onskuldig pleit op al die aanklagte teen hom, het sy prokureur Woensdag gesê.
Adv. ML Sharma het gesê dat hy namens Ram Singh, wat glo die bus bestuur het, sal pleit.
“Ek verteenwoordig Ram Singh en ek sal namens hom onskuldig pleit,” het Sharma, wat ook Singh se broer Mukesh en Akshay Thakur in die saak verteenwoordig, aan AFP gesê.
Sharma het Dinsdag gesê Mukesh en Thakur sal ook onskuldig pleit op alle aanklagte.
Die jong student is op 16 Desember verkrag. Die ses verdagtes het haar daarna na bewering uit die bus gegooi en oor haar probeer ry. Die verkragting het 'n skerp reaksie in Indië en die res van die wêreld ontlok.
'n Sesde beskuldigde, wat 17 jaar oud is, sal na verwagting in 'n hof vir minderjariges verhoor word.
“Wie ook al die misdaad gepleeg het, moet gestraf word, maar my kliënte is nie die werklike misdadigers nie,” het Singh gesê.
Die polisie het vroeër aan verslaggewers gesê hulle het bloedmerke gevind wat die mans met die aanval verbind, maar die regsverteenwoordiger het gesê hy sal vrae opper oor die manier waarop die polisie die bewyse hanteer het.
Die mans sal weer op 10 Januarie in die hof verskyn.
– Volg Nuus24 op Twitter
- Sapa - AFP
