Derde joernalis vas vir meeluistering
2011-04-14 21:00
Londen - ‘n Senior verslaggewer by die News of the World-koerant is Donderdag in hegtenis geneem deur speurders wat die meeluistering op telefoongesprekke en –boodskappe van bekendes deur dié koerant ondersoek.
James Weatherup word by ‘n polisiekantoor in Londen ondervra.
Hy is die derde persoon wat vasgetrek is sedert die metropolisie in Londen hul ondersoek heropen het na aantygings dat personeel van News of the World toegang gekry het tot die selfoonboodskappe van bekendes en politici om inligting vir stories te bekom.
Dié poniekoerant se eienaar, Rupert Murdoch se News International, het verlede week ‘n openbare verskoning uitgereik, in sommige gevalle skuld erken en gesê dié dade was “onaanvaarbaar”.
Die Hollywood-aktrise Sienna Miller tel glo onder dié aan wie vergoeding uit ‘n fonds van 20 miljoen pond (sowat R224 miljoen) aangebied is. Sy wil egter glo hê die hele skandaal moet in die hof oopgevlek word en het nog geensins aangedui dat sy vergoeding sal aanvaar nie.
Die aanvanklike ondersoeke in 2007 het gelei tot die inhegtenisneming en vonnissing van die koerant se koninklikheid-korrespondent, Clive Goodman, en die private speurder Glenn Mulcaire.
Dit het bekend geword dat hulle onwettig toegang gekry het tot selfoonboodskappe van Prins Harry en Prins William om inligting vir stories te bekom.
Tot en met die verskoning wat Vrydag uitgereik is, het die News of the World daarop aangedring dat Goodman en Mulcaire op hul eie gewerk het.
Die polisie het ook verlede week die hoofverslaggewer Neville Thurlbeck (50) en ‘n voormalige assistent-redakteur, Ian Edmondson (42) in hegtenis geneem.
- Volg Nuus24 op Twitter
- Sapa - AFP