Debat oor doodstraf ná 10-jarige keelaf gesny word

2012-12-06 13:23

Taipei – Die moord op ‘n 10-jarige seun in Taiwan het ‘n debat ontketen oor die doodstraf ná die moordenaar gesê het hy sal wegkom met lewenslange tronkstraf.

Die seuntjie is oor die naweek keelaf gesny by ‘n speelgrond.

Die publiek het woedend gereageer ná die 29-jarige verdagte aan die media gesê het dat hy hoogstens 'n lewenslange vonnis sal kry.

Die verdagte het bygevoeg dat hy die moord gepleeg het sodat hy tronk toe kan gaan, omdat hy dan nie oor lewenskostes bekommerd sal wees nie.

Betogers het buite die kantore van die departement van justisie bymekaar gekom en daarop aangedring dat die verdagte tereggestel word.

Altesaam 61 gevangenes wag tans op die doodstraf in Taiwan, maar ‘n regsgeding en verdeeldheid tussen politieke leiers het veroorsaak dat party gevangenes al 25 jaar in die dodeselle wag.

“Die regering het in die afgelope twee jaar niemand tereggestel nie, so misdadigers begin dink hulle kan met lewenslange tronkstraf wegkom as hulle moord pleeg,” het Angela Wang, hoof van ‘n kindersorgprogram, gesê.

Taiwan se politieke leiers is tans verdeeld oor of hulle die doodstraf moet afskaf.

– Volg Nuus24 op Twitter
 

- Sapa - AFP