Costa Allegra-passasiers vertel van nagmerrie
2012-03-02 18:08
Rome – Talle passassiers van die Italiaanse passasierskip die Costa Allegra het van die Seychelle af teruggekeer na Europa ná dié skip 'n volle drie dae sonder krag in die Indiese Oseaan rondgedobber het.
Die toeroperateur Costa Crociere het vlugte uit die Seychelle bespreek vir passasiers wat genoeg gehad het van hul rampspoedige vakansie-ondervinding.
"Dit sou nie reg gevoel het om voort te gaan met hierdie vakansie nie, wat heeltemal geruïneer is," het een passasier, ene Jonathan, aan verslaggewers by Rome se Fiumicino-lughawe gesê.
"Toe ons rook sien was daar paniek, veral toe die ligte afgaan en ons in die donker gelaat is," het Jonathan, een van 36 lede van die toergroep wat in Rome geland het, gesê.
Altesaam 114 passasiers het Vrydag teruggekeer Europa toe.
'n Ander passasier het vertel van die toestande op die skip.
"Die ergste ding was om nie in staat te wees om die toilet te gebruik nie. Die skip was vol ontlasting in sommige dele en dit het gestink."
"Mense het begin baklei oor 'n stoel, dit was elkeen vir homself," het 'n ander passasier gesê.
Costa Crociere het vroeër gesê sowat 70% van die 627 passasiers op die Costa Allegra het besluit om in die Seychelle aan te bly vir 'n vakansie wat deur die toeroperateur self betaal word. Passasiers sal ook vergoed word.
– Volg Nuus24 op Twitter.
- AFP
