Kaptein se aandag afgelei deur oproep

2012-07-11 09:45

Rome – Die kaptein van die Costa Concordia het in ‘n onderhoud wat Dinsdag uitgesaai is, gesê sy aandag is kort voordat die toerskip ‘n rif naby ‘n Italiaanse eiland getref en gesink het, deur 'n telefoongesprek afgelei.

Altesaam 32 mense is in die ongeluk dood.

Francesco Schettino het die ongeluk aan die privaat Italiaanse televisiekanaal Canale 5 beskryf as ‘n “banale ongeluk” waarin “lot” ‘n rol gespeel het.

‘n Italiaanse regter het Schettino se huisarres verlede week opgehef, maar het gesê hy moet vir die duur van die kriminele ondersoek in sy tuisdorp naby Napels bly. Hy staan tereg op aanklagte van manslag, dat hy skipbreuk veroorsaak het en die skip verlaat het terwyl baie passasiers en bemanningslede nog aan boord was.

Aanklaers beweer die Concordia het as deel van ‘n reklamefoefie te naby aan die Giglio-eiland gevaar en dat Schettino kort voor die ongeluk op die telefoon was met ‘n afgetrede seekaptein op die eiland.

“Ek blameer myself dat my aandag afgelei was,” het Schettino gesê nadat hy oor die oproep gevra is.

Nietemin het dit Dinsdag voorgekom of Schettino sy rol in die voorval wou verminder en het daarop aangedring dat ‘n ander beampte aan die stuur van die skip was toe dit die rif getref het.

“Op daardie oomblik het ek opgegaan na die brug. Ek het beveel dat die navigasie met die hand gedoen moet word en ek was nie aan die stuur nie. Daar was ‘n (laer) beampte wat die skip gestuur het,” het Schettino gesê.

“Hierdie is ‘n banale ongeluk waarin lot plek gevind het in die interaksie van mense,” het Schettino bygevoeg.

Hy het gesê vir ‘n skeepskaptein is daar “geen maatstaf van hartseer” vir die verlies van ‘n skip nie. Nietemin, het hy gesê “dit is baie minder” seer as om ‘n kind te verloor – ‘n verwysing na ‘n jong Italiaanse meisie wat onder die slagoffers was.

– Volg Nuus24 op Twitter

- Sapa - AP