Colorado-skieter het psigiater gesien

2012-07-27 23:45

Denver – Die voormalige nagraadse student, James Holmes (24), wat van die Colorado-skietery beskuldig word waarin 12 mense dood is, het behandeling by ’n psigiater ontvang by die universiteit waar hy gestudeer het, volgens hofdokumente wat Vrydag deur Holmes se prokureurs ingedien is.

Die pakkie wat die sogenaamde Colorado-skieter aan sy psigiater gestuur het, en waarop owerhede Maandag beslag gelê het, kan egter sy kanse op ’n regverdige verhoor belemmer.

In die dokumente word Holmes as 'n pasiënt van dr Lynne Fenton beskryf.

“Die inhoud van die pakke kan Holmes se kanse op ’n regverdige verhoor belemmer omdat die inligting daarin vertroulik beskou moet word,” het Holmes se prokureurs in die hofdokumente gesê.

Owerhede het Maandag op die pakkie beslag gelê na dit in die poskamer by die Universiteit van Colorado gevind is. Dit is nie duidelik of dit voor of na die aanval op 20 Julie gestuur is nie.

– Volg Nuus24 op Twitter.

- SAPA