Colombiaanse dwelmmuil gee homself oor
2012-10-05 15:30
Bogota – 'n Vermeende Colombiaanse dwelmmuil, Luis Enrique Calle, het hom aan die Amerikaanse dwelmeenheid in Panama oorgegee, het Colombia se minister van verdediging Donderdag gesê.
"Hierdie misdadigers het geen ander opsie nie. Die druk deur sekuriteitsmagte laat hulle met geen ander keuse nie en dit is hoekom hulle hulle oorgee," het Juan Carlos Pinzon, minister van verdediging, op 'n mediakonferensie in Bogota gesê.
Calle (36) word beskou as die leier van "Los Rastrojos", 'n gewelddadige kriminele netwerk wat sommige smokkelroetes beheer en tonne kokaïen jaarliks na Amerika stuur.
Colombiaanse polisiebeamptes het gesê verskeie dwelmmuile in Andean onderhandel om hulle aan die Amerikaanse dwelmeenheid oor te gee.
Ligter vonnisse word vir die dwelmmuile in Amerika aangebied in ruil vir inligting oor ander dwelmbase en hul smokkelroetes.
Luis Enrique is die derde Calle-broer wat vanjaar vir dwelmhandel aangekeer is. Die Amerikaanse regering het $2,7 miljoen (sowat R23 miljoen) vir sy inhegtenisname aangebied.
Javier Antonio Calle het hom in Mei in Aruba oorgegee en sy broer, Juan Carlos, is in Maart in Ecuador in hegtenis geneem.
– Volg Nuus24 op Twitter.
- Reuters
