Clinton verwerp steun aan M23-rebelle

2012-11-29 08:15

Washington – Hillary Clinton, Amerika se minister van buitelandse sake, het Woensdag gevra dat alle steun wat die M23-rebelle in die Demokratiese Republiek van die Kongo ontvang, gestaak moet word.

Clinton, wat uitgewys het dat 285 000 mense al uit hul huise gedwing is as gevolg van die geweld, het gevra dat die rebelle die hawestad Goma moet verlaat.

“Ons vra dat leiers en regerings in die res van Afrika enige steun aan die rebelle staak,” het Clinton gesê na ‘n vergadering met die voorsitter van die Afrika-unie, Nkosazana Dlamini-Zuma.

“Die humanitêre impak van hierdie geweld is verwoestend,” het Clinton bygevoeg.

Clinton het ook die rebelle se taktiek van vrees en intimidasie veroordeel. Vroeër vandeesmaand is berig dat die rebelle verskeie noodlenigingswerkers met die dood gedreig het.

– Volg Nuus24 op Twitter
 

- Sapa - AFP