Christene ‘ergste vervolg’ in Noord-Korea
2010-01-19 08:28
Leopold Scholtz
Den Haag. – Noord-Korea, Iran en Saoedi-Arabië staan boaan die lys van lande waar Christene vervolg word, lui die jaarverslag van die organisasie Open Doors, wat die vervolging van Christene wêreldwyd monitor.
In ’n verklaring sê Carl Moeller, hoof van Open Doors se afdeling in Amerika, oor Noord-Korea daar is geen ander land ter wêreld waar Christene so “gruwelik en sistematies” vervolg word nie.
Tog groei die Christelike gemeenskap daar, veral in die streke naby die Chinese grens.
Volgens Klaas Muurling, Open Doors se woordvoerder, is daar sowat 400 000 Christene in dié land wat slegs in die grootste geheimhouding byeen kan kom.
’n Geraamde 50 000 mense sit weens hul geloof in die tronk uit ’n totaal van 200 000 wat op grond van hul oortuigings aangehou word.
Open Doors het die situasie in 50 lande ondersoek en punte toegeken op grond van faktore soos die wetgewing insake godsdiensvryheid, die vryheid om ’n kerk te stig en die aantal Christene wat gemartel en vermoor word.
Volgens Muurs het die regime van pres. Mahmoed Ahmadinedjad van Iran in 2008 met ’n veldtog teen Christene begin en dit verlede jaar voortgesit. Minstens 85 Christene is in hegtenis geneem en baie gemartel.
Ander lande in die toptien is Somalië, die Maledive, Afganistan, Jemen, Mauritanië, Laos en Oezbekistan. Altesame 35 van die 50 lande op die lys het ’n Moslemregering.
–Beeld