Christene behoort nie fees te vier, sê kerkleiers
2011-05-03 08:57
Pretoria - Christene behoort nie fees te vier oor die dood van ’n ander mens nie – selfs al is dit Osama bin Laden.
Dié boodskap is Maandag van verskillende kante af die wêreld ingestuur nadat die nuus oor Bin Laden se dood gelei het tot feesvieringe buite die Wit Huis in Washington en in New York waar die aanvalle van 11 September 2001 plaasgevind het.
Die Wêreldraad van Kerke het twee Bybeltekste via Twitter uitgestuur. Spreuke 24:17 sê: “Moet jou nie verheug oor jou vyand se val nie, moenie juig wanneer hy ondergaan nie.”
Esegiël 18:32 lui: “Dit is nie my wil dat die mens moet sterf nie,’ sê die Here my God, maar dat hy hom bekeer en bly lewe.”
By albei tekste het die Wêreldraad bygevoeg: “Bid vir vrede en geregtigheid.”
Vader Federico Lombardi, direkteur van die Vatikaan se mediakantoor, het gesê almal weet Bin Laden was verantwoordelik vir die bevordering van haat en geweld tussen mense. Hy het die dood van tallose onskuldige mense veroorsaak en godsdiens vir dié doel uitgebuit.
As iemand dood is, verheug Christene hulle egter nie daarin nie. Hulle dink na oor hul ernstige verantwoordelikheid voor God en mense en verbind hulself daartoe om nie by te dra tot meer haat en verdeeldheid nie, maar tot vrede.
Ook in Suid-Afrika het teoloë in die kuberruimte soortgelyke sentimente gedeel.
Ds. Reggie Nel, sendingwetenskaplike van Unisa, wat aan die gesprekke deelgeneem het, het by navraag gesê Christene moet ’n probleem hê met vieringe oor die dood van ’n mens.
Christene moet hulle beywer vir vrede met geregtigheid, en dit moenie deur weerwraak en bloedvergieting bereik word nie.
Hy het hom geskaar by die sober boodskap van die Vatikaan en gesê dit moet ’n mens verder neem as die siklus van geweld en weerwraak.
- Volksblad