Chirac beskuldig van nóg korrupsie
2011-09-13 08:30
Den Haag - ’n Nuwe korrupsieskandaal dreig weer in Frankryk. Dié keer gaan dit oor bewerings dat vyf Afrika-presidente altesaam meer as R600 miljoen in kontant bygedra het tot die destydse pres. Jacques Chirac se suksesvolle herverkiesingsveldtog in 2002.
Chirac staan op die oomblik juis tereg in Parys op aanklagte van korrupsie wat dateer van die jare van sy burgemeesterskap van die hoofstad toe hy na bewering politieke vriende in betaalde poste aangestel het sonder dat hulle ooit ’n steek werk verrig het.
Die bejaarde oudpresident is nie self in die hof aanwesig nie omdat hy glo siek en geestelik “nie heeltemal by” is nie.
Robert Bourgi, deesdae blykbaar ’n raadgewer van pres. Nicolas Sarkozy, het in ’n opsienbarende onderhoud met die Franse blad Le Journal du Dimanche gesê die skenkers was press. Abdoulaye Wade (Senegal), Blaise Compaoré (Burkina Faso), Laurent Gbagbo (Ivoorkus), Denis Soussou Ngouesso (Kongo-Brazzaville), Omar Bongo (Gaboen) en Obiang N’Guema (Ekwatoriaal-Guinee).
Bourgi sê hy het gereeld tussen Parys en Wes-Afrika gependel en elke keer ’n koffer propvol note teruggebring wat hy persoonlik aan Chirac oorhandig het.
Hy het ook ’n ander invloedryke politikus, Dominique de Villepin, betrek deur te sê hy het gesien hoe Chirac en De Villepin die geld tel.
De Villepin is Sarkozy se politieke aartsvyand. Die twee haat mekaar glo met ’n verterende passie.
Bourgi het daarna van lojaliteit verwissel en vir Sarkozy gaan werk. Sarkozy het hom met ’n Legion d’Honneur – ’n hoë burgerlike onderskeiding – vereer.
Chirac en De Villepin het aangekondig dat hulle Bourgi weens laster gaan aankla. Maar ’n onafhanklike joernalis, Pierre Péan, het die bewerings bevestig in ’n boek wat binnekort gepubliseer word.
Luidens berigte in die Franse media het ’n luitenant van oudpres. Gbagbo, Mamadou Koulibaly, dit ook bevestig.
Volg Nuus24 op Twitter.
- Die Burger