Chinese student kritiek ná suur-aanval
2012-10-12 10:29
Sydney – 'n Chinese universiteitstudent was Vrydag in 'n kritieke toestand in 'n Australiese hospitaal nadat 'n medestudent glo suur in sy gesig gegooi en hom met 'n hamer oor sy kop geslaan het.
Volgens die polisie is 'n 26-jarige man daarvan aangekla dat hy die 25-jarige student Donderdag by 'n chemiese navorsingslaboratorium by die universiteit van Nieu-Suid-Wallis in Sydney aangeval het.
"Daar word beweer die een student het chemikalieë, wat glo swawelsuur was, in die ander student se gesig gegooi voordat hy hom tydens hul stryery met 'n hamer oor sy kop geslaan het,” het die polisie in 'n verklaring gesê.
Albei mans is Chinese burgers wat besig is om hul PhD-grade te voltooi, het die universiteit gesê.
Die slagoffer, bekend as Cheng Xiaoyu, is na die St. Vincent-hospitaal vir noodbehandeling geneem, maar is later na die Royal North Shore-hospitaal se brand-eenheid oorgeplaas waar hy in 'n kritieke toestand is.
Sy vermeende aanvaller, Zhang Rui, het Vrydag in 'n hof in Sydney verskyn en is borgtog geweier.
Die landdros, Jacqueline Milledge, het gesê Rui sal vir psigiatriese waarneming gestuur word voordat hy weer op 29 November in die hof moet verskyn.
– Volg Nuus24 op Twitter.
- Sapa - AFP
