Chinees jammer dat hy man van NS vermoor
2011-08-02 14:30
Shanghai – ‘n Chinese man het in die hof erken hy ‘n
Nieu-Seelandse taxi-bestuurder vermoor, gesê hy is jammer en vir ‘n ligter straf gevra.
Xiao Zhen (24) is in Januarie verlede jaar in China in
hegtenis geneem vir die moord op die Aucklandse taxi-bestuurder Hiren Mohini
(39).
Die saak is die eerste waarin iemand aangekla van moord
in Nieu-Seeland in ‘n ander land verhoor word. China en Nieu-Seeland het nie ‘n
uitleweringsooreenkoms nie.
Xiao het in ‘n hof in Shanghai erken dat hy kort na die voorval
uit Nieu-Seeland gevlug het en vir familie en vriende in China gesê het hy het
teruggekom vir ‘n besoek.
Die Nieu-Seelandse polisiebeampte Hywel Jones en ‘n
verteenwoordiger van die Nieu-Seelandse ambassade was in die hof teenwoordig
maar het nie gepraat nie.
Xiao het sy berou oor die voorval in die hof uitgespreek en gesê
hy het homself verdediging toe ‘n argument tussen die twee uitgebreek het oor ‘n
taxi-fooi.
“Ek het nie bedoel om die bestuurder dood te maak nie. Ek is
jammer vir wat ek gedoen het. Ek is skuldig,” het Xiao, wat ‘n netjies wit
katoenhemp en swart broek aangehad het, gesê.
“Vergewe my asseblief ... ek is nog jonk, het nie ‘n
kriminele rekord nie en is die enigste kind in my gesin. Ek het nie myself oorgegee nie, want ek was bang vir wat met my sou gebeur. Neem asseblief
hierdie redes in ag om vir my ‘n ligter straf te gee.”
Xiao se familie het buite die hof gesê hulle het ‘n brief
aan Mohini se familie gestuur waarin hulle om verskoning vra, maar het nie ‘n
reaksie gekry nie.
“Ons het ‘n brief aan die slagoffer se familie gestuur,” het
Xiao se tannie, Li Liping, gesê. “Daar is ‘n Chinese spreuk wat sê as die
seun die wet oortree, dit die pa se skuld is. Niemand het die reg om enigiemand
anders se lewe te neem nie. Ons berou wat hy gedoen het.”
Die Chinese vervolgingsgesag het egter gesê Xiao het bedoel
om Mohini seer te maak.
“Hoewel Xiao Zhen se gewelddadige optrede nie vooraf beplan
was nie, het hy bedoel om die bestuurder seer te maak,” het die staatsaanklaer,
Feng Zhiyu, gesê. “Wat hy gedoen het is ‘n ernstige misdaad en hy moet tussen tien jaar en lewenslank tronk toe gaan.”
Die staatsaanklaers het gesê ‘n ligter straf sal slegs
oorweeg word as die slagoffer se gesin Xiao vergewe.
– Volg Nuus24 op
Twitter.
- AP