China wil 'goeie samaritaan'-wet instel
2011-11-02 13:13
Beijing – 'n Stad in die suide van China oorweeg dit om ‘n wet in te stel wat sal verhoed dat mense wat vreemdelinge help, gedagvaar word, het ‘n verslag Woensdag gelui.
Dit kom ná ‘n voorval waar ‘n beseerde kleuter onlangs deur 18 verbygangers geïgnoreer is.
Amptenare in Shenzhen is besig om reëls op te stel wat mense met goeie bedoelings teen regstappe sal beskerm as hul poging om iemand te help onsuksesvol was, “solank daar geen nalatigheid of sabotasie was nie”, het die China Daily berig.
Daar was hernude versoeke vir sulke wette in China nadat ‘n tweejarige meisie verlede maand dood is toe daar twee keer in die suidelike stad Foshan oor haar gery is.
Minstens 18 mense het verby die meisie geloop terwyl sy bewusteloos in die straat gelê het.
Die voorval het die hele land geskok.
Miljoene Chinese het die beeldmateriaal van die voorval op die internet gekyk en dit het gelei tot bespiegeling dat die land se vinnige groeitempo en verstedeliking veroorsaak dat mense meer selfsugtig word.
Berigte het gesê verbygangers was moontlik bang dat hulle verantwoordelik gehou sal word as hulle stop om te help.
Dit volg ná ‘n voorval in 2006 waar ‘n bestuurder, wat gestop het om ‘n bejaarde vrou te help, later daarvan beskuldig is dat hy haar omgery het en gevolglik gedagvaar is.
Westerse lande soos die VSA, Kanada en Australië het reeds wette wat mense teen sulke regstappe beskerm. In Frankryk kan mense aangekla word as hulle nie iemand wat in gevaar is probeer help nie.
– Volg Nuus24 op Twitter
- Sapa - AFP