China swyg oor Brit se dood
2009-12-29 11:29
Beijing – China het Dinsdag sy besluit verdedig om ‘n Britse man die doodstraf toe te dien nadat hy glo dwelms die land ingesmokkel het.
Die Chinese departement van buitelandse sake wou egter nie bevestig of die 53-jarige Akmal Shaikh reeds tereggestel is nie.
Gordon Brown, Brittanje se premier, het Dinsdagoggend in ‘n persverklaring bekendgemaak dat Shaikh tereggestel is en gesê hy is “geskok en ontsteld” deur China se besluit.
“’n Britse burger het die doodstraf ontvang omdat hy dwelms in China ingesmokkel het. Dit was ‘n onafhanklike kriminele saak. Die Chinese regbank het die saak streng volgens die wet hanteer,” het Jiang Yu, woordvoerder vir die Chinese departement van buitelandse sake, gesê.
“China het die verweerder se regte ten volle beskerm.”
Jiang Yu wou egter nie aan joernaliste bevestig of Shaikh reeds in Urumqi tereggestel is nie. Hy het alle navrae na die streeksregering verwys.
Die streeksregering het egter nie dadelik op die navrae gereageer nie.
Na bewering het Jiang Yu wel gesê; “Ons is baie ontevrede en wil ons afkeer uitspreek teenoor Brittanje se aantygings. Ons hoop nie dit sal die verhouding tussen China en Brittanje beïnvloed nie.”
–Sapa