China skrap MIV-reisverbod
2010-04-28 11:17
Beijing - China het 'n 20 jaar lange reisverbod, wat mense met MIV/Vigs verhoed om in die land te kom, geskrap.
Dié aankondiging is enkele dae voor die opening van die Sjanghai-ekspo, wat na verwagting miljoene buitelandse besoekers na dié land gaan bring, gemaak.
China se kabinet het in 'n verklaring op sy webtuiste gesê die regering het wysigings aan dié verbod op 19 April aangekondig. Dié wysiging is onmiddellik van krag.
Die VSA en Suid-Korea het op 1 Januarie reisbeperkings vir mense met MIV geskrap.
Ban Ki-moon, sekretaris-generaal van die Verenigde Nasies, het China se besluit verwelkom en ander lande aangemoedig om hul wette so gou as moontlik te verander.
Die Sjanghai-ekspo begin Saterdag en duur ses maande.
– Sapa-AP