China beskerm president se seun
2009-07-23 09:58
Beijing – China het Donderdag die nuus van ‘n ondersoek oor omkopery in Namibië gesensor as gevolg van die moontlike betrokkenheid van president Hu Jintao se seun.
Twee Namibiërs en ‘n Chinese man is verlede week in Namibië in hegtenis geneem as deel van ‘n ondersoek in omkopery waarin die maatskappy Nutech betrokke is.
Dié maatskappy is tot verlede jaar deur Hu Haifeng, die president se 38-jarige seun, bestuur.
Wanneer daar op Chinese webwerwe oor die saak en Hu Haifeng se betrokkenheid ondersoek ingestel is, het die Chinese webwerwe slegs fout-boodskappe opgelewer.
China het ‘n geskiedenis waarin hulle toegang tot sensitiewe inligting op die internet blokkeer, veral waar politiek en top leiers betrokke is.
China Digital Times, wat webontwikkelinge in China monitor, het gesê dat propaganda-amptenare ‘n bevel uitgestuur het wat verskeie internetsoeke wat met die Nutech saak verband hou, verhoed.
Nutech verkoop sekuriteitstoerusting.
Die maatskappy se verteenwoordiger, Yang Fan, en twee Namibiërs, Teckla Lameck en Jerobeam Mokaxwa, is in hegtenis geneem.
Dit was nadat Namibië se Anti-Korrupsie Kommissie (ACC) gevind het dat ‘n $12.8 miljoen (R98 miljoen) betaling vir 13 skandeerders aan ‘n maatskappy, Teko Trading, wat aan die twee Namibiërs behoort, betaal is.
Speurders het gesê dat al drie later groot hoeveelhede geld uit die Teko rekening onttrek het.
Yang het glo $2.1 miljoen (R16 miljoen) onttrek, waarvan hy vermoedelik die meeste in ‘n beleggingsfonds inbetaal het.
Hu Haifeng was tot verlede jaar die president van Nutech, waarna hy bevorder is na sekretaris van die Kommunistiese Party se Tsinghua Holdings, wat Nutech en meer as 20 ander maatskappye beheer.
- Sapa - AFP