China bal vuis vir Japan oor eilande

2012-10-19 07:27

Beijing – China het Vrydag gereed gestaan om militêre skepe en vegvliegtuie na die Oos-Chinese See te stuur terwyl 'n voortslepende dispuut met Japan oor die eienaarskap van 'n eilandgroep dreig om betrekkinge tussen dié twee lande verder te versuur.

Altesaam 11 vaartuie, wat oorlogskepe insluit, sal saam met agt vliegtuie na waters aan die land se ooskus gestuur word, het owerhede in Beijing gesê.

Die Xinhua-nuusagentskap het laat Donderdag gesê die bote en vliegtuie sal deelneem aan militêre oefeninge ter beveiliging van die Diaoyu-eilande, soos dit in China bekend staan.

Die grondgebied staan in Japan bekend as die Senkaku-eilande.

Xinhua het gesê die oefeninge is daarop gemik om seker te maak dat China gereed is om die "soewereiniteit oor sy grondgebied en maritieme belange" te beskerm.

Die ministerie van verdediging het nog nie verdere inligting oor die sending bekend gemaak nie, en dis nie duidelik presies waar en wanneer dit sal plaasvind nie.

Die onmin oor die eilandgroep het toegeneem toe Japan se regering verlede maand besluit het om die eilande amptelik te "nasionaliseer".

Dié stap het tot protesoptrede teen Japan in China gelei, wat selfs die verkope van Japans-vervaardigde produkte in China beïnvloed het.

– Volg Nuus24 op Twitter.

- AFP