China, Japan weer rooi onder die kraag

2012-12-07 09:01

Tokio – Vier skepe van die Chinese regering het Vrydag gevaar in gebiedswaters van 'n groep eilande in die Oos-Chinese See wat deur Tokio beheer word, het die Japanse kuswag gesê.

Die skepe het kort voor 01:00 in die gebied van 12 seemyl om Kubashima, een van die eilande in die Senkaku-reeks, gevaar.

China en Japan is die laaste paar maande in 'n diplomatiese stryd gewikkel om beheer oor die eilandreeks, ná dit vir dekades spanning tussen die twee lande veroorsaak het.

Chinese vaartuie is die afgelope paar maande gereeld in die gebiedswaters aktief.

Beijing het Maandag 'n sekerheidsverdrag tussen die VSA en Japan, waarvolgens die VSA Japan se beheer oor die eilande erken, as 'n "produk van die Koue Oorlog" beskryf.

Volgens die verdrag het die VSA nie 'n amptelike posisie oor die eienaarskap van die eilande nie, maar hy "erken dat Japan die Senkaku-eilande beheer".

– Volg Nuus24 op Twitter.

- SAPA