China: 137 vas wat met organe smokkel

2012-08-05 17:52

Beijing – Die Chinese polisie het 137 mense, ondermeer dokters, in hegtenis geneem wat van die handel in menslike organe verdink word, het owerhede gesê.

Die polisie het in 18 provinsies in China aksie geneem en in 127 gevalle ingegryp waar mense ooreengekom het om hul organe aan onwettige handelaars te skenk, het die ministerie van openbare veiligheid gesê.

Altesaam 18 dokters word ook aangehou vir die uitvoer van onwettige oorplantingsoperasies, het ’n verslag op die ministerie se webwerf gelui.

“Die verdagtes het vervalste dokumente gebruik om gesonde kandidate by hospitale of op die internet te werf, waarna hulle in afsondering aangehou is,” het hy gesê.

– Volg Nuus24 op Twitter.