Chileense polisie en studente bots
2011-08-05 16:15
Santiago – Die polisie in Chili se hoofstad moes skoliere en
universiteitstudente wat die strate ingevaar het Donderdag met waterkanonne en
traangas in toom hou.
Polisiebeamptes moes op perde brandende voorwerpe uit die
strate verwyder. Altesaam 552 studente is in hegtenis geneem en minstens
veertien polisiebeamptes en twee jongmense is beseer.
Chili se minister van binnelandse sake Rodrigo Hinzpeter en
ander Chileense owerhede het studente voor Donderdag se betogings gewaarsku dat
dié veldtog as onwettig beskou sal word en dat polisie moontlik met geweld sal
reageer.
Die studente dring op hervormings in die land se ongelyke openbare skolestelsel aan en het nietemin met die
protesoptog voortgegaan.
Brandende bande en versperrings by talle punte in Santiago het die stad
se verkeer vir ure lank laat stilstaan.
“Alle dinge het hul perke,” het pres. Sebastian Pinera gesê.
Hinzpeter het bygevoeg “die tyd vir protesoptogte het
uitgeloop”.
– Volg Nuus24 op
Twitter.
- SAPA