Chavez kankervry, gereed vir verkiesingsveldtog

2012-07-10 11:47

Caracas, Venezuela – Hugo Chavez, president van Venezuela, het Maandag bevestig dat hy kankervry is en reg is om met sy verkiesingsveldtog te begin.

Chavez het gepraat by ‘n mediakonferensie en het gesê hy beplan om binnekort met sy veldtog te begin na maande se bestraling, rehabilitasie en mediese toetse. Chavez het ook sy land se burgers gerus gestel dat sy fisieke beperkings nie sy verkiesingsveldtog sal beïnvloed nie.

“Ek voel elke dag fisiek beter,” het hy gesê.

Die sosialistiese leier het nie besonderhede soos die tipe kanker wat by hom gediagnoseer is, bekend gemaak nie.

Chaves het ná sy behandeling minder in die openbaar verskyn en gekies om liewer toesprake via die televisie en radio te doen.

Analiste het getwyfel of hy sterk genoeg sou wees om aan die verkiesing te deel te neem, en gerugte het die ronde gedoen dat hy ‘n opvolger sou aanstel.

Chavez het ‘n beroep op sy ondersteuners gedoen om hulle reg te maak vir ‘n “aanvallende strategie” in die opkomende veldtog.
 
– Volg Nuus24 op Twitter 

- Sapa - AP