Chaos op vlug by Heathrow-lughawe
2010-01-09 01:48
Londen - Gewapende polisiebeamptes het Saterdagoggend drie verdagtes aan boord ‘n vlug op Heathrow-lughawe in hegtenis geneem na “verbale dreigemente”.
Volgens Sky News Online het die polisie die verdagtes bestorm en toe gearresteer. Verskeie snuffelhonde is ook aan boord die vliegtuig gebring.
Die verdagtes is onderskeidelik 58, 48 en 36 jaar oud.
“Ek kan bevestig dat daar ‘n voorval aan boord vlug C019 na Dubai was,” het ‘n woordvoerder by die lughawe gesê.
Die lughawe is steeds oop en die res van die vlugte sal soos gewoonlik voortgaan.
Veiligheidsmaatreëls verskerp:
Lugdienste wêreldwyd het hul veiligheidsmaatreëls verskerp ná ’n mislukte terreuraanval op ’n Northwestern/Delta-vlug van Amsterdam na Detroit in die VSA.
Umar Farouk Abdulmutallab (23), ’n Nigeriër wat bande met Al-Kaïda het, het glo op Kersdag plofstof aan sy lyf aan boord Vlug 253 gesmokkel en wou dit laat ontplof kort voordat die vliegtuig in Detroit in die deelstaat Michigan sou land.
Passasiers en bemanningslede het hom egter oorrompel en die vlug het veilig geland, waarna die vermeende terroris na ’n hospitaal geneem is.
Abdulmutallab is die seun van ’n ryk Nigeriese bankier, Alhaji Umaru Mutallab, wat glo die Amerikaanse en Nigeriese owerhede ses maande gelede oor sy seun se radikale neigings gewaarsku het.
Hy het voorheen in Londen gestudeer en ’n Islam-skool in Jemen bygewoon.
–Sky News Online, AFP, Sapa
VIDEO: Ooggetuie vertel: