Chaos heers ná bomdreigemente by Amerikaanse universiteite

2012-09-14 18:28

Washington – Twee Amerikaanse universiteite, een in Texas en een in Noord-Dakota, moes ontruim word ná albei bomdreigemente ontvang het.

“’n Man met ‘n Midde-Oosterse aksent het die universiteit gebel. Hy het gesê dat hy deel van al-Kaïda is en dat bomme binne 90 minute regoor die kampus sal afgaan,” het Tara Doolittle, woordvoerder vir die Universiteit van Texas, gesê.

‘n Besluit is geneem om die kampus te ontruim en die 90 minute het verby gegaan sonder enige voorval. Plaaslike polisiebeamptes het egter steeds op die kampus gebly.

“Die geboue is steeds ontruim. Ons maak seker dat die kampus veilig is. Ons kan nie op die oomblik sê of die voorval ‘n poets was nie.”

Die Universiteit van Noord-Dakota het in ‘n afsonderlike voorval ook ‘n bomdreigement ontvang en het ook sy kampus ontruim.

– Volg Nuus24 op Twitter
 

- Sapa - AFP