Bulgarye: Premier bedank ná opstand

2013-02-20 13:51

Sofia – Bulgarye se premier, Boyko Borisov, het Woensdag bekendgemaak dat hy sy regering sal ontbind ná dae se betogings in sy land.

“Ek sal vandag (Woensdag) ná die laaste kabinetsvergadering die bedanking van my regering indien,” het Borisov aan die parlement gesê.

Hy het gesê hy wil die moontlikheid van meer geweld tydens betogings vermy. Verskeie mense is die afgelope twee dae in Sofia beseer in gevegte tussen betogers en die polisie.

“Elke druppel bloed is ‘n skande vir ons,” het Borisov gesê. "Ek sal nie deel wees van ‘n regering wat teen sy eie mense baklei nie – die mense het die mag aan ons gegee, vandag gee ons dit terug.”

Die landswye golf van betogings is die gevolg van skerp stygings in die elektrisiteitsprys. Borisov se bedanking is geëis te midde wydverspreide ontevredenheid oor armoede in Bulgarye en die regering se besnoeiingsmaatreëls.

Borisov se Gerb-party het in Julie 2009 aan bewind gekom nadat hy beloof het om die lewensstandaard te verbeter en om korrupsie te bekamp.

Verkiesings het gewoonlik in Julie plaasgevind, maar verkiesings sal waarskynlik nou aan die einde van April gehou word, het ontleders gesê.

– Volg Nuus24 op Twitter

 

- Sapa-DPA