Buitelanders in Algerië ontvoer

2013-01-16 18:06

Algiers – Sekuriteitsamptenare in Algerië sê twee mense is vermoor en ses buitelanders is ontvoer na ‘n aanval op ‘n gas-fasiliteit in die ooste van die land.

Die Islamic Maghreb (AQIM)-rebellegroep het verantwoordelikheid vir die aanval geneem, het BBC News berig.

Hulle beweer dat hulle ses mense ontvoer het.

BP het bevestig dat ‘n gasveld wat dit saam met vennote bestuur, in Algerië aangeval is.

Altesaam ses mense is ook in die aanval beseer.

Brittanje se departement van buitelandse sake het ook bevestig dat daar Britse burgers by die aanleg werk.

‘n Woordvoerder kon egter nie bevestig of van die Britse personeel ontvoer is nie.

Eamon Gilmore, Ierland se minister van buitelandse sake, het gesê dat een van hul burgers tydens die aanval ontvoer is. Hy het bygevoeg dat Ierland alle bronne beskikbaar sal stel om seker te maak dat hul burger so gou as moontlik vrygelaat word.

‘n Japannese amptenaar het ook bevestig dat Japannese burgers ook ontvoer is.

Algerië se weermag het met ‘n operasie begin om die ontvoerdes terug te kry.

Lees hier meer.

– Volg Nuus24 op Twitter