Brown besweer gesondheidsvrese
2009-09-27 13:24
Londen - Die Britse premier, Gordon Brown, het Sondag op politieke skinderpraatjies oor sy gesondheid gereageer deur te sê hy neem nie voorgeskrewe pynstillers nie. Hy het ook beklemtoon dat hy gesond genoeg is om sy land te lei.
Tydens 'n onderhoud op die BBC om die begin van die Arbeidersparty se jaarlikse kongres te vier, het Brown vrae beantwoord oor gerugte in Westminster dat hy "voorgeskrewe pynstillers en ander pille gebruik om hom aan die gang te hou".
"Nee, hierdie is die soort van vrae wat heeltemal te dikwels in Britse politiek na vore kom," het Brown gesê.
"Wanneer mense vrae oor hierdie soort goed vra, veral oor my sig, voel ek ek het alles in my vermoë gedoen om aan mense te bewys dat ek die werk kan doen ten spyte van die probleme waarmee ek sukkel as gevolg van 'n rugbybesering."
Brown het die sig in een van sy oë verloor ná 'n ongeluk tydens 'n rugbywedstryd as tiener, en moes 'n reeks operasies ondergaan om die sig in sy ander oog te red.
Die voormalige minister van finansies, wat 'n agterstand het in vergelyking met die Konserwatiewe party in meningsopnames voor die verkiesing volgende Junie, moes in die afgelope paar weke herhaaldelik vrae beantwoord oor sy gesondheid.
Politieke skinderwebwerwe en joernaliste het verskeie stories oor Brown se gesondheid vroeër in die maand geplaas, maar dié BBC-onderhoud was die eerste keer wat hy in die openbaar uitgevra is oor medikasie.
Verslaggewers het hom ook verlede week uitgevra oor sy gesondheid, waarop Brown geantwoord het dat hy "gesond en baie fiks" is, en dat hy gereeld draf.
- Reuters