Brittanje in ysgreep ná somerweer

2012-04-04 09:01

Leopold Scholtz

Den Haag – Die temperatuur in Skotland en die noorde van Engeland het Maandag en Dinsdag met meer as 20°C gedaal toe die vroeë somerweer skielik plek gemaak het vir ’n groot sneeustorm en vrieskoue.

Net ’n week gelede is die hoogste temperatuur ooit vir Maart in die Skotse dorp Aboyne in Aberdeenshire gemeet – 23,6 °C. Gister was die maksimum temperatuur slegs 2 °C, en dit het gepaardgegaan met sterk wind en sneeu. Eergisternag is tot -5 °C gemeet.

Teen gistermiddag het tot 25 cm sneeu reeds op sommige plekke geval, plek-plek binne vier uur. Die ontwrigting was relatief beperk, aangesien die verkeer tydens die Paasvakansie minder as gewoonlik is.

Die sneeu en koue het gister suidwaarts na Wallis en Noord-Engeland uitgebrei.

Die Britse weerdiens het voorspel dat die koue nie te lank sal duur nie en dat die weer teen die naweek weer normaal sal wees. Die verwagting was ook nie dat dit na Londen sou uitbrei nie.

Groot dele van Europa het pas onverwagte somerweer beleef met temperature van 20 °C of warmer. Die gemiddelde maksimum temperatuur vir dié tyd van die jaar is 10 °C tot 12 °C.

– Volg Nuus24 op Twitter.

- Die Burger