Brittanje beplan om vinnige spoorlyn te bou
2012-01-10 17:05
Londen – Die Britse regering het die bou van ‘n hoëspoed-treinspoor tussen die land se twee grootste stede goedgekeur, ondanks die teenstand van talle inwoners wat langs die voorgestelde roete woon.
Die doel van die spoorlyn, wat 140 km lank is, is om die reistyd tussen Londen en Birmingham van 90 minute na 49 minute te verkort en gaan sowat £32 miljard (sowat R400 miljard) kos om te bou.
Sommige wetgewers, omgewingsbewaarders en inwoners is teen die projek gekant en sê die beplande roete sal die prentjiemooi platteland verwoes. Dit is ook te duur en sal nie tot die voordeel van alle Britte wees nie.
Die departement van vervoer het Dinsdag gesê dat die wetgewing vir die nuwe treinspoor volgende jaar ingestel gaan word.
Die spoorlyn behoort teen 2026 klaar te wees en sal daarna na stede in die noorde uitgebrei word.
– Volg Nuus24 op Twitter.
- Sapa - AP