Britse vrou 'verpletter' oor doodstraf
2013-01-23 11:39
Denpasar – ‘n Britse ouma, Lindsay Sandiford, is “verpletter” nadat sy tot die doodstraf gevonnis is vir dwelmsmokkelary op die Indonesiese eiland Bali, het haar prokureur Woensdag gesê.
Volgens Esra Karokaro, haar prokureur, het Sandiford skaars gepraat sedert sy gevonnis is nadat sy byna vyf kilogram kokaïen in die land ingesmokkel het. Die vonnis het as ‘n skok gekom nadat aanklaers aanvanklik slegs vir ‘n tronkstraf van 15 jaar gevra het.
“Sy is beslis verpletter deur die uitspraak. Sy is sielkundig geruk,” het Karokaro aan AFP gesê.
Hy het bevestig dat sy waarskynlik appèl sal aanteken teen die vonnis.
Sandiford was volgens amptenare die aanvoerder van ‘n groep mense wat dwelms gesmokkel het. Sy is Dinsdag in ‘n hof in Bali se hoofstad, Denpasar, gevonnis.
Sy het glo die dwelms, wat $2,4 miljoen (R21 miljoen) werd was, in haar tas gehad toe sy in Mei op ‘n vlug van Bangkok aangekom het. Sy het aangevoer dat sy gedwing is om dit te vervoer en dat haar kinders gedreig is.
Hillary Parsons, Sandiford se suster, wat ook by die verhoor was, was ook “geskok” deur die vonnis, het Karokaro gesê.
“Haar suster het my gevra oor die regsprosedures wat gevolg moet word om aansoek om appèl te doen,” het hy gesê en bygevoeg dat hy voel die doodstraf is “buitensporig”.
Die appèlproses in Indonesië neem gewoonlik 'n paar jaar om te voltooi, insluitend uitgerekte sittings voor regters by die hooggeregshof. Daarna is 'n presidensiële kwytskelding die enigste uitweg.
– Volg Nuus24 op Twitter
- AFP
