Britse spioen ontken kollega se seksaanklagte

2012-12-10 17:50

Londen – ‘n Britse spioen, onder die skuilnaam Mark Barton, het in die hof verskyn en ontken dat hy ‘n kollega seksueel aangerand het.

Nie die beskuldigde of die aanklaer se name word bekend gemaak nie as gevolg van veiligheidsmaatreëls. Die 28-jarige spioen sal onder die skuilnaam Mark Barton verhoor word terwyl sy beweerde slagoffer as 2363 sal bekend staan.

Die beskuldigde sal nie deur die publiek gesien kan word nie, maar die regter en die jurie sal wel kan sien hoe hy lyk. Getuies sal deur hul ID-nommers of eerste name geïdentifiseer word.

“Barton” het Maandag in die hof twee aanklagte van aanranding en een klagte van seksuele aanranding ontken.

Die spioen, wat op borgtog vrygelaat is, se verhoor sal Junie begin.

– Volg Nuus24 op Twitter
 

- Sapa - AP