Britse soldaat verdrink, later geskiet in Afganistan
2011-07-05 12:03
Kandahar – ‘n Afgaanse bevelvoerder sê die Britse soldaat wat in die suide van Afganistan vermis geraak het, het verdrink nadat hy in ‘n stroom naby sy militêre basis gaan swem het.
Die soldaat se raaiselagtige dood volg nadat hy vroeg Maandagoggend vermis geraak het.
Die departement van verdediging in Londen het later aangekondig dat sy lyk vol skietwonde in die Helmand-provinsie gevind is.
Die Taliban het terselfdertyd ‘n verklaring uitgereik waarin hy gesê het sy vegters het die soldaat doodgeskiet.
Sayed Maluk, top- Afgaanse bevelvoerder vir die provinsie, sê die soldaat is in ‘n rivier gevind nadat hy glo verdrink het. Hy sê rebelle het later op sy lyk geskiet.
“... Hy (die soldaat) het geswem in ‘n stroom wat deur sy basis vloei. Die vloei van die water was baie vinnig en hy het verdrink...” het die bevelvoerder gesê.
“Toe die Taliban die lyk van ‘n Britse soldaat in die stroom sien, het hulle sy lyk geskiet,” het hy beweer.
Dié nuus kom nadat daar reeds teenstrydige inligting rondom die soldaat se verdwyning en dood was.
Volg Nuus24 op Twitter.
- Sapa - AFP