Britse paartjie wat lotto wen wil ander ook ryk maak
2011-10-11 19:55
Londen – Die Britse paartjie wat £101 miljoen (sowat R1.2 miljard) in die
EuroMillions lotery gewen het, het gesê hulle wil hul familie en vriende ook ryk maak.
Hulle hoop om sowat 20 goeie vriende en familielede
oornag in miljoenêrs te verander.
Dave Dawes, ‘n toesighouer by ‘n
voedselvervaardiger, en sy lewensmaat, Angela Dawes, wat in ‘n tweedehandse
klerewinkel werk, het Brittanje se EuroMillions-boerpot gewen.
Tydens ‘n mediakonferensie het Dave Dawes
gesê hy kon die nie glo toe hy die trekking op TV kyk en besef dit is
hulle nommers wat opkom nie.
“Dit was mal. Ek kon my oë nie glo nie,” het hy gesê.
Die paartjie, wat nie getroud is nie maar kies
om dieselfde naam te gebruik, moes tot Maandag wag om te bevestig dat hulle die
boerpot gewen het.
Dit het hulle oorgenoeg tyd gegee om solank te
besluit wat hulle met al die geld gaan doen.
“My ma en pa bly in Portugal, so ons gaan ‘n
huis daar koop en volgende jaar trou,” het Angela Dawes gesê.
“Dave het my reeds gevra om te trou en ek het al ‘n verloofring, maar nou gaan ons ‘n groter een koop,” het sy bygevoeg.
David, ‘n kranige Chelsea-aanhanger, het gesê
hy gaan beslis seisoenkaartjies vir al Chelsea se wedstryde koop.
Hulle wil ook na die luukse buurt rondom Stamford Bridge, Chelsea se tuisveld, verhuis.
Die paartjie is egter nie heeltemal selfsugtig
nie en het gesê hulle gee graag hul geld aan geliefdes.
Hulle het 'n lys van sowat 20 vriende en familielede, onder andere kinders uit vorige verhoudinge, wat 'n paar miljoen elk sal ontvang.
Voordat die geld heeltemal op is, sal hulle egter seker maak 'n welwillendheidsorganisasie kry ook iets.
Volg Nuus24 op Twitter.
- Sapa - AFP