Britse ouma kry doodstraf oor dwelms in Bali

2013-01-22 10:37

Denpasar – ‘n Indonesiese hof het Dinsdag ‘n 56-jarige Britse ouma tot die doodstraf gevonnis nadat sy kokaïen na Bali gesmokkel het.

“Ons het Lindsay Sandiford bo enige twyfel en wettiglik daaraan skuldig bevind dat sy dwelms ingesmokkel het... en ons het die beskuldigde tot die doodstraf gevonnis,” het regter Amser Simanjuntak in die Denpasar-streekhof gesê.

Sandiford is in Mei by Bali se internasionale lughawe in hegtenis geneem nadat sy met 4,79 kg kokaïen in haar bagasie betrap is. Volgens die polisie het sy hulle daarna gehelp om drie Britte en ‘n Indiër vir dwelmhandel vas te trek.

Die swaar vonnis kom as ‘n skok ná aanklaers verlede maand voorgestel het dat Sandiford slegs 15 jaar tronkstraf uitdien. Hulle was van mening dat sy ‘n ligte vonnis verdien, aangesien sy haar oortreding erken het en tydens die hofsaak saamgewerk het.

‘n Ander regter op die paneel, Bagus Komang Wijaya Adi, het egter Dinsdag gesê daar is “geen versagtende omstandighede om vir toegeeflikheid in die saak toe te laat nie.

“Alle bewyse teen die beskuldigde was inkriminerend,” het hy gesê.

Swaar strawwe teen dwelmhandel geld in Indonesië, insluitend die doodstraf en lewenslange tronkstraf.

– Volg Nuus24 op Twitter

 

- AFP