Britse lugmag 'sal sukkel' met lang Libië-konflik
2011-06-21 14:16
Londen – Die hoof van Britse vliegoperasies het gewaarsku dat die toekoms van die lugmag se veldtogte in Libië in gedrang kan kom as dit vir baie lank moet aanhou.
Sir Simon Bryant het aan wetgewers gesê die dubbele aanslag in Afganistan en Libië plaas groot druk op toerusting sowel as personeel, in ‘n tyd waarin moraal “broos” is weens grootskaalse begrotingsbesnoeiings.
Bryant se kommentaar is verlede maand in ‘n operasionele brief gemaak en Dinsdag deur Daily Telegraph gepubliseer ná die koerant die brief in die hande gekry het.
Die hoof van die Britse vloot, Mark Stanhope, het vroeër ook gesê die land se weermag sal moeilike besluite in die gesig staar indien sy veldtog in Libië vir meer as ses maande voortgaan.
David Cameron, die Britse premier, hou egter vol dat sy land hul deel in die Navo-alliansie in Libië kan doen vir so lank as wat dit nodig is.
Volg Nuus24 op Twitter.
- Sapa - AFP