Brit wat vrou vermoor se derde verhoor begin
2011-12-12 19:02
Montauban – 'n Brit wat in die tronk is nadat hy sy vrou vermoor en haar lyk in 'n meer in Frankryk gegooi het, het Maandag met die begin van sy derde verhoor volgehou hy is onskuldig.
"Ek is nie op enige manier verantwoordelik vir die dood van my vrou nie. Ek is totaal onskuldig. Ek het geen rede gehad om my vrou dood te maak nie," het die 50-jarige Robert Lund aan die hof gesê.
Lund is in 2007 tot 12 jaar tronkstraf gevonnis op 'n aanklag van onvrywillige moord op sy vrou, Evelyn, wie se lyk in 2002 in 'n meer gevind is, twee jaar nadat sy van hul huis in die suidweste van Frankryk verdwyn het.
Sy derde verhoor kom nadat hy appèl aangeteken het op 'n punt van regsprosedure.
Lund het sy 52-jarige vrou op Nuwejaarsdag in 2002 as vermis aangemeld en aan ondersoekbeamptes gesê hy dink sy was in 'n ongeluk betrokke nadat sy baie gedrink en besluit het om by vriende te gaan kuier.
Ten spyte van 'n intensiewe soektog na Evelyn se oorskot is sy eers twee jaar ná haar verdwyning gevind.
Haar lyk is in haar motor in die Bancalie-meer, tussen die Lund-familiehuis in Rayssac en dié van die vriende by wie sy veronderstel was om te gaan kuier, gevind.
Die Lund-familie het in 1997 na die streek getrek.
Volgens Lund se prokureur, Apollinaire Legros-Gimbert, is daar genoeg onsekerhede in die saak, insluitend die oorsaak van Evelyn se dood, om te hoop dat hy kwytgeskeld sal word.
Legros-Gimbert het egter erken sy kliënt neem 'n kans met die nuwe verhoor omdat hy aan moord skuldig bevind kan word en 'n langer tronkvonnis in die gesig staar.
Hy het gesê die feit dat Lund bereid is om 'n kans te neem is bewys van sy onskuld.
'n Prokureur vir Evelyn se familie, Henri Renier, het gesê Lund wil kwytgeskeld word om sodoende haar boedel en geld van haar lewenspolis te erf wat gevries is nadat hy skuldig bevind is.
– Volg Nuus24 op Twitter.
- AFP