Brit vlug uit Taiwan met vriend se paspoort
2013-01-30 12:45
Taipei – ‘n Britse man wat ‘n vier jaar lange tronkstraf moes uitdien nadat hy ‘n Taiwannees doodgery het terwyl hy onder die invloed van alkohol was, het met ‘n vriend se paspoort uit die land gevlug.
Zain Taj Dean, 'n etniese Indiër, is in Julie 2012 deur die hooggeregshof skuldig bevind en tot vier jaar tronkstraf gevonnis nadat hy in Maart 2010 ‘n plaaslike man doodgery het terwyl hy dronk was.
Dean sou sy vonnis op 21 September begin uitdien, maar het nie by beamptes aangemeld nie. Aanklaers het ‘n lasbrief uitgereik en sy borgtog is opgeskort.
Verdere ondersoeke het getoon dat Dean, wat in sy vroeë 40’s is, op 14 Augustus uit Taiwan gevlug het. Hy het sy vriend, wat slegs as David geïdentifiseer is, se paspoort gebruik om te vlug. David is 'n wit man, ‘n ander lengte en sowat 10 jaar jonger as Dean.
Die immigrasie-beampte wat David se vervalste paspoort goedgekeur het, het punte op die strafpuntstelsel verloor.
Nietemin is die slagoffer se familie woedend oor wat gebeur het.
Aanklaers het in ‘n verklaring belowe om die saak verder te ondersoek en om samewerking van Britse beamptes te kry.
David is Dinsdag in hegtenis geneem op aanklagte van vervalsing, die versteking van die beskuldigde en die oortreding van immigrasiewette.
– Volg Nuus24 op Twittter
- AFP
