Brit glo aan Taliban gegee en toe geskiet
2011-07-06 08:11
Pretoria - Die lyk van ’n Britse soldaat is gekry nadat hy Maandagoggend by ’n kontrolepunt in Afganistan vermis geraak het.
Sktr. Scott McLaren is doodgeskiet.
Die Britse weermag het Dinsdag in ’n verklaring bevestig dat die soldaat van die 4de Bataljon van die Skotse Regiment (4 Scots) in die Nahr-e Saraj-distrik in die Helmand-provinsie dood is.
Volgens die weermag is die omstandighede van sy dood nog duister nadat hy om onverklaarbare redes ná sy wagbeurt nie na sy basis teruggekeer het nie.
Die vermoede is dat hy moontlik saam met soldate van die Afgaanse weermag wat saam met die Britse soldate werk na ’n nabygeleë nedersetting gegaan het.
Volgens The Telegraph het hy blykbaar saam met die Afgaanse soldate gaan swem toe hy “weggeraak” het.
Die Taliban het McLaren moontlik ontvoer.
As dít die geval is, is dit die eerste keer dat ’n Britse soldaat lewend deur die Taliban ontvoer en doodgeskiet is.
Volgens die koerant het die Afgaanse soldate beweer hulle het gedink hy het moontlik verdrink.
Hewige gevegte het egter die laaste paar weke in dié gebied gewoed.
Van die plaaslike inwoners het beweer McLaren is aan plaaslike insurgente oorhandig.
Die Afgaanse polisie het bevestig dat hy ontvoer en later doodgeskiet is.
McLaren was gewapen, maar daar is geen teken dat hy sy wapen afgevuur het nie.
- Beeld