Maksimum vonnis vir Breivik

2012-08-24 10:15

Oslo – Die massamoordernaar Anders Behring Breivik is Vrydag deur 'n hof in Oslo tot 21 jaar tronkstraf gevonnis nadat hy in 2011 in twee aparte aanvalle die lewe van 77 mense geneem het.

Die regters het ook bevind dat Breivik tydens die aanvalle op 22 Julie by sy volle verstand was.

Breivik se verhoor het 10 weke geduur, met oorlewendes en ander ooggetuies wat getuienis gelewer het.

Die 33-jarige het erken dat hy verantwoordelik is vir 'n bom wat buite die kantoor van premier Jens Stoltenberg ontplof het. Agt mense is in die ontploffing dood.

Breivik het daarna na die Utoeya-eiland gegaan waar hy 69 mense, meestal jongmense, doodgeskiet het.

Die jongste slagoffer was net 14 jaar oud.

Altesaam 445 dae is van Breivik se vonnis afgetrek vir die periode wat hy reeds agter tralies spandeer het.

Noorweegse wetgewing maak nie voorsiening vir lewenslange tronkstraf nie, en die maksimum vonnis vir moord is 21 jaar. Slegs 'n klein persentasie van gevangenes dien meer as 14 jaar se tronkstraf uit.  

Die wet maak wel voorsiening vir die verlenging van vonnisse in die vorm van addisionele periodes van vyf jaar wat aan die einde van die strafperiode opgelê word indien die gevangene nog as 'n gevaar vir die samelewing beskou word. Dit beteken dat Breivik effektief lewenslank agter tralies kan wees.   

DEEL JOU MENING: Wat is jou opinie oor die uitspraak/ vonnis? Stuur jou mening na [e-mail].

– Lees hier meer.

– Volg Nuus24 op Twitter.