Brasilië: Dodetal styg ná brand by nagklub
2013-01-28 07:33
Santa Maria, Brasilië – Minstens 245 mense het vroeg Sondagoggend gesterf nadat 'n brand by 'n volgepakte nagklub in die suidelike Brasiliaanse stad van Santa Maria uitgebreek het, het die polisie gesê.
Die dodetal van die brand het aanvanklik op 70 gestaan, maar het vinnig gestyg terwyl brandbestryders deur die puin gesif het. Volgens berigte was daar ten tyde van die brand tussen 300 en 400 mense in die Kiss-nagklub.
Brasilië se president, Dilma Rousseff, het haar besoek aan Chili kortgeknip om die reaksie op die tragedie te hanteer, het 'n beampte gesê.
Die oorsaak van die brand is nie bekend nie, maar daar is berig dat die brand kort ná 02:00 uitgebreek het, terwyl 'n universiteitspartytjie aan die gang was. 'n Rockgroep, wat vermoedelik vuurwerke gebruik het, het by die partytjie opgetree.
Guido de Melo, brandweerhoof van Santa Maria, het gesê die brand het wydverspreide paniek veroorsaak en dat baie mense of vertrap of weens rookinaseming gesterf het.
Maj. Cleberson Bastianello het bevestig dat 245 mense dood is en het aan AFP bevestig dat 48 ander mense in die hospitaal opgeneem is.
– Volg Nuus24 op Twitter
- AFP
