Branderplankryer sterf in haai-aanval
2010-08-17 13:05
Sydney – ‘n Australiese branderplankryer het gesterf nadat hy Dinsdag deur ‘n haai aangeval is, het die plaaslike media berig.
Na bewering was daar byna twee jaar laas ‘n noodlottig haai-aanval in Australiese waters.
Volgens die plaaslike media het ander branderplankryers die man uit die water gehaal en dadelik noodhulp op hom toegepas. Die 31-jarige slagoffer het egter gesterf.
“Ons het ons beste probeer om die bloeding te stop en sy been vasgebind,” het Eddie Kilgallon, ‘n branderplankryer, gesê.
“Daar was byna niks van sy been oor nie. Ek het dit probeer vashou. Die onderste deel van sy dy was heeltemal oopgeruk en in stukke. Die helfte van sy kuitspier was weg.”
Volgens Kilgallon het ander branderplankryers probeer om die slagoffer aan die lewe te hou, nadat die voorval by South Point, naby Gracetown (270km vanaf Perth) plaasgevind het.
“EK het gesien dat hy ‘n trouring aangehad het en vir hom gesê dat sy vrou hom weer sal wil sien. Sy gesig het wit geword, maar ons kon daarin slaag om sy kleur terug te kry. Dit is toe dat ek gedink het hy staan ‘n kans om te oorleef.”
Rob Alder, ‘n inwoner van Gracetown wat noodbehandeling (CPR) op die slagoffer toegepas het, meen dit was die perfekte dag om in die see te wees.
“Ek het die slagoffer se bord op die water sien dryf. Dit het in ‘n sekonde gebeur,” het hy aan ABC Radio gesê.
Alder het die nooddienste ontbied en die slagoffer te hulp gesnel.
Hierdie is die eerste aanval sedert Desember 2008 toe ‘n man deur ‘n reuse-witdoodshaai aangeval is terwyl hy en sy seun gesnorkel het.
Volg Nuus24 op Twitter.
- Sapa - AFP