Brande saai verwoesting in Colorado

2012-06-11 09:35

Los Angeles – Een persoon word vermis en duisende hektaar grond is verwoes in brande wat steeds in die Amerikaanse staat Colorado woed, het beamptes gesê.

Honderde mense is in die Denver-gebied uit hul huise ontruim.

Die brand, wat die High Park Fire genoem word, het vroeg Saterdag naby Fort Collins, sowat 100 km noordwes van Denver uitgebreek.

Die brand het teen Sondag meer as 5 600 hektaar land verwoes.

Een persoon is as vermis aangemeld.

Nick Christensen, 'n polisiewoordvoerder, het gesê 18 huise is deur die brand verwoes of beskadig. Ongeveer 2 600 ontruimingsbevele is reeds uitgereik.

Minstens 250 brandweermanne het Sondag probeer om die brand te blus, maar owerhede het gesê hulle vrees dat winde, wat in die middag sou voorkom, hul pogings in die wiele kan ry.

Die oorsaak van die brand is nie bekend nie maar 'n ondersoek is aan die gang.

– Volg Nuus24 op Twitter.
      

- Sapa - AFP