Borgtog geweier in kannibalisme-saak
2013-01-08 17:24
New York – ‘n Amerikaanse man is Maandag borgtog geweier in 'n kannibalisme-saak, na ‘n staatsaanklaer aangevoer het dat die beskuldigde erken het hy het beplan om vroue saam met 'n polisiebeampte te ontvoer, verkrag, vermoor en te eet.
Regter Henry Pitman het geweier om borgtog aan Michael Vanhise toe te staan ná hy in hegtenis geneem is vir die beplanning van grusame misdade saam met ene Gilberto Valle, ‘n polisiebeampte in New York.
Die 28-jarige Valle sal oor twee weke in die hof verskyn.
Geen vroue is egter al deur die mans beseer nie, en Vanhise se regsverteenwoordiger het aangevoer dat haar 22-jarige kliënt self probeer het om die polisie te waarsku oor ander mans wat beplan het om dieselfde grusame dade uit te voer.
Vanhise en Valle het mekaar op die internet ontmoet, waar hulle saam met ander mans die misdade bespreek en beplan het.
Die aanklaer het aangevoer dat Vanhise foto’s van sy twee susterkinders, wat sewe en nege jaar oud is, en sy drie-jarige stiefdogter, aan die ander mans gestuur het en hulle as potensiële slagoffers uitgewys het.
– Volg Nuus24 op Twitter
- AP
