Bom op bus ontspoor nie koningin se besoek
2011-05-18 08:55
Dublin. – ’n Saamgeflanste bom op ’n bus net buite die Ierse hoofstad het koningin Elizabeth II van Brittanje nie van stryk gebring nie.
Volgens The Telegraph is die bom in die bagasieruim gekry van ’n bus in Maynooth in die Kildare-distrik, net wes van Dublin. Dit is gisteroggend vroeg onskadelik gestel.
Dit is die eerste besoek deur ’n Britse monarg aan Ierland sedert dié land in 1921 onafhanklik geword het.
Die doel is om te wys hoe eeue se vyandigheid nou vervang is deur ’n sterker, vriendeliker verhouding.
Die koningin word vergesel deur haar man, die hertog van Edinburg. Die monarg is by die Casement-vliegveld verwelkom deur mnr. Eamon Gilmore, Ierse minister van buitelandse sake. Die vliegveld is genoem na ’n Britse diplomaat wat in 1916 tereggestel is omdat hy die Iere se nasionalistiese strewe ondersteun het.
Sy is seremonieel verwelkom deur pres. Mary McAleese, ’n Katoliek van Noord-Ierland en aktivis vir beter betrekkinge tussen die twee lande.
Die ontmoeting is gevolg deur ’n noenmaal van geroosterde tarbotvis en tradisionele Ierse aartappelpannekoek.
Die koningin het ’n erewag voor die presidentswoning inspekteer en het ’n kanonsaluut van 21 skote gekry.
Dié woning is die voormalige tuiste van die onderkonings wat die Britse beheer oor Ierland gevoer het.
Inwoners van Dublin het hul misnoeë getoon met die bom.
“Dis sleg. Hulle sleep ons terug na die donker eeue,” het mnr. Tom O’Neill, ’n 34-jarige verkoopman, gesê. “Daar is mense in die land wat die hele Engelse ding agter hulle moet sit. Hulle is ons bure.”
Militante nasionaliste wat gekant is teen die Britse beheer oor Noord-Ierland het vermoedelik die bom geplant.
Die vierdaagse Britse besoek word gekenmerk deur Ierland se grootste veiligheidsoperasie tot dusver. Strate oor die hoofstad heen is afgesper, kilometers lange versperrings is opgerig en sowat 4 000 polisielede en 2 000 soldate patrolleer die middestad.
- Volg Nuus24 op Twitter.
- Reuters