Bom naby kerk gevind
2011-04-21 21:00
Jakarta - Indonesië het Donderdag gesê dié land is op hoë waaksaamheid kort voor die Paasnaweek nadat die polisie verdagtes in hegtenis geneem het in verband met ‘n reeks “boek-bomme” en ‘n gefnuikte aanval op ‘n kerk in Jakarta.
Die koördinerende Minister vir Politieke, Geregtelike en Veiligheidsake, Djoko Suyanto, het gesê die president “het die weermag, polisie en mense wat daarvoor omgee om teen terrorisme te veg instruksie gegee om veiligheid in die land te verseker in die aanloop tot Paasfees”.
“Van vannag tot en met Opstandingsdag sal die polisie op hoë waaksaamheid wees in aangewese gebiede,” het Suyanto gesê.
Volgens die nasionale polisiewoordvoerder, Anton Bachrul Alam, het die teenterreur-polisie altesaam 19 mense in hegtenis geneem.
Die “boek-bomme” is na verskeie adresse gestuur, insluitende dié van liberale Moslemfigure en ‘n teenterreur-beampte, maar niemand is dood in dié aanvalle nie.
Nóg ‘n bom in ‘n pakkie is Donderdagoggend naby ‘n kerk in Serpong, in die buitewyke van Jakarta, gevind, het ‘n plaaslike polisiehoof, Heribertus Ompusunggu, aan AFP gesê.
“Die bom is op ‘n leë erf met ‘n gaspyp wat onder die grond loop, gelos,” het hy gesê.
Die 19 mense wat in hegtenis geneem is, word verbind met ‘n selfmoordbomaanval by ‘n moskee in die plaaslike polisie-hoofkwartiere in Cirebon.
Die aanvaller, wat sy bom laat ontplof het tydens Vrydag-gebede, is op slag dood en het 30 mense beseer.
Dit was die eerste selfmoorbomaanval binne ‘n moskee in die land met die grootste Moslem-meerderheid ter wêreld.
Indonesië is in onlangse jare geteister deur ‘n reeks aanvalle deur die terreurnetwerk Jemaah Islamiyah, wat onder meer vir die 2002-bomaanvalle in Bali, waarin 202 mense dood is, verantwoordelik is.
- Volg Nuus24 op Twitter
- Sapa - AFP