Boer skiet seun per ongeluk dood
2012-08-26 11:30
Katmandoe – 'n Boer in suidelike Nepal het sy seun doodgeskiet nadat hy die kind verkeerdelik vir 'n aap wat kos in sy mielieveld soek, aangesien het, het die polisie Sondag gesê.
Chitra Bahadur Pulami het in 'n boom geklim om die lastige apies te verjaag, maar sy 55-jarige pa, Gupta Bahadur, het hom verkeerdelik as een van die diere aangesien en begin skiet.
"Die seun het in 'n boom op die plaas weggekruip om die apies, wat kos in die mielieveld soek, te verjaag," het Arun Poudel, polisiewoordvoerder in die Arghakhanchi-distrik gesê.
"Die kind is op die toneel dood nadat Gupta Bahadur gedink het daar is 'n apie in die boom en begin skiet het. Ons voorlopige ondersoek toon dat die pa nie bewus was dat sy seun na die mielieveld gegaan het om die apies te verjaag nie."
"Die polisie het beslag gelê op die vuurwapen wat in die skietery gebruik is, en Gupta Bahadur is in polisieaanhouding."
Die boer het Vrydag aan die webwerf nagariknews.com gesê hy het eers sy fout agtergekom toe "my seun uit die boom geval en aan een van die takke gehang het."
– Volg Nuus24 op Twitter
- AFP
