Boek oor McCanns bly verbode, sê hof
2010-02-20 09:21
Lissabon – Die ouers van die vermiste Britse kind Madeleine McCann het onderneem om aan te hou soek na haar.
Dit kom nadat hulle ’n saak in ’n Portugese hof gewen het teen ’n gewese polisie-inspekteur wat in sy boek beweer het dat Madeleine dood is.
Goncalo Amaral, wat aanvanklik die ondersoek na Madeleine se verdwyning in 2007 gelei het, het misluk in sy poging om ’n geregtelike verbod op sy boek oor die saak om te keer, het ’n woordvoerder van die kind se ouers gesê.
Madeleine, wat ten tyde van haar verdwyning drie jaar oud was, het in Mei 2007 uit haar ouers se vakansiewoonstel verdwyn.
Dit het gebeur toe hulle saam met vriende gaan uiteet het in die suidelike Portugese toeriste-oord Praja de Luz.
Kate en Gerry McCann (albei 41) het Amaral van naamskending beskuldig omdat hy in die boek beweer het Madeleine is dood en dat haar ouers by die gebeure betrokkewas.
Die McCanns het die besluit van die siviele hof in Lissabon verwelkom en gesê hulle is “tevrede en verlig”.
Die hofsaak het “skokkend” getoon dat geen polisiemag meer na Madeleine soek nie.
Die McCanns het Brittanje en Portugal aangemoedig om elke moontlike leidraad te ondersoek en het ’n pleidooi om hulp aan die Portugese publiek gerig.
Amaral het gesê hy sal teen die hofbeslissing appelleer.
Daar sal later ’n volle hofsaak wees oor of die boek permanent verbied behoort te word, het die McCanns se prokureur, me. Isabel Duarte, gesê.
Die McCanns soek ook €1,2 miljoen (sowat R12,5 miljoen) as vergoeding vir naamskending in ’n aparte geregtelike geding teen Amaral.
- Sapa
-Die Burger