Boeing se battery-vervaardiger ondersoek

2013-01-21 17:10

Tokio – Ondersoekbeamptes in Japan en Amerika ondersoek die vervaardiger van die litium-ioon-batterye wat gebruik is in Boeing se 787-vliegtuie.

Tsutomu Nishijima, ‘n woordvoerder vir GS Yuasa, het Maandag gesê die ondersoekbeamptes het die maatskappy se hoofkwartiere in Kyoto, Japan, besoek en dat Yuasa sy samewerking gee.

Hy kon nie kommentaar lewer oor die besonderhede van die ondersoek en of dit langer as Maandag sal duur nie.

Beamptes van die ministerie van vervoer wou ook nie kommentaar lewer oor die ondersoek of die bevindinge nie.

‘n Oorverhitte battery het verlede week daartoe gelei dat ‘n All Nippon Airways-vlug ‘n noodlanding moes maak. Al 50 787-vliegtuie wat Boeing aan lugrederye gelewer het se vlugte is intussen opgeskort.

Die vervaardiger het die lewering van nuwe vliegtuie gestaak totdat die elektriese probleme aangespreek kan word.

– Volg Nuus24 op Twitter

 

- Sapa - AP